Tambar møtte veggen

Det var divisjonsskilnad då Sandane tok imot Tambarskjelvar.

Sandane - Tambarskjelvar 6-0 (1-0)

4. divisjon

1-0 (30. min) Thomas Dyrrdal

2-0 (47. min) Jonas Løvland

3-0 (51. min) Martin Svarstad

4-0 (58. min) sjølvmål

5-0 (72. min) Thomas Dyrrdal (straffe)

6-0 (90. min) Jonas Løvland

Sandane Idrettspark, kunstgras

Dommar: Frank Heggestad, Veitastrond

Rødt kort (to gule) Tambarskjelvar: Andreas Vatne

Gule kort: Jørgen Engebø, Tambarskjelvar og Ingebjørn Mundal, Sandane

Sandane: Simon Gimmestad (Arne Nybø Gangeskar frå 88. min), Vegard K. Flatjord (Sebastian Bujnicki frå 46. min), Martin Svarstad, Håkon Schjølberg, Kyrre V. Kroken (William Landøy frå 88. min), Eirik Rauset (Bjarte Leite Kalvøy frå 83. min), Andreas B. Vereide, Jonas Løvland, Ole Andre Aa (Gudmund Bjotveit frå 68. min), Ingebjørn Mundal (Martin Sivertsen frå 75. min), Thomas Dyrrdal (Magnus N. Bolseth frå 88. min). 

Sandane var det førande laget frå start til mål, og sigeren kunne fort blitt større. Når det er sagt: 6-0 er svært bra, same kven divisjonsmotstandaren er. På stillinga 2-0 kom Andreas Vatne si utvising, og etter dette såg Sandane seg ikkje tilbake. Periodevis var Tambarskjelvar ikkje over midtstreken. Derfor litt skuffande når STIL let tempoet falle, begynte med føring av ball og gav Tambar ro til å kome meir med spelemessig utover i første omgang. Med Jonas Løvland sitt pangmål i andre omgangs første minutt var imidlertid Sandane på sporet. Publikum var vitne til ei rekke flotte angrep, som når Martin Svarstad ordna 3-0, og ved ei rekke høve elles. 

Det var gledeleg å sjå Eirik Rauset i fleire avslutningsposisjonar, og med meir rutine vert det mål på ungguten. Ole Andre Aa var ein eigen dimensjon på Sandane sin høgrekant, spelbar og med finter og dragningar som brakte Tambars back til fortviling meir enn ein gong. Ole Andre var servitør på Sandane si 1-0-skåring. Jonas Løvland sto for to av måla og er ein playmaker av rang. Med seg på midten har han hardtarbeidande Andreas Vereide og Ingebjørn Mundal, begge leverte ein god kamp. 

Sandanes forsvar hadde stålkontroll og las spelet svært godt. Tambars offensive spelarar hadde både styrke og hurtigheit, men klarte aldri å spele ut Sandane. Ei god avslutning frå distanse var Tambars behaldning i første omgang. I andre omgang vart laget sett tilbake med utvisinga, og det var langskotet frå 30-40 meter (i tverrliggaren) som kunne fortent ein betre skjebne. Elles full kontroll i dei bakre rekker. Pluss til vårt solide midtstopparpar. Venstreback Kyrre Vereide Kroken har på kort tid spelt seg inn på laget, og hadde fleire fine offensive raid i kampen. 

Mot slutten av kampen spelte Sandane med tre mann i forsvar, og det var eit vedvarande trøkk mot Tambarskjelvars mål. Dette var kampen for innbytte, og Gudmund Bjotveit kom inn og gjorde sine saker svært bra. Bjarte Leite Kalvøy og Arne Nybø Gangeskar fekk sine debutar i seriesamanhang for A-laget mot slutten av kampen. 

Eit rekordstort publikum treng ein særskilt kommentar. Ei stor gruppe elevar frå Nordfjord folkehøgskule, sang, ropte, tromma og laga liv kampen igjennom. Kjempekjekt for spelarane, og for alle som var til stades. Slik kan det altså vere på fotballkampar, også på Sandane. Vi må tilbake til tidleg 80-tal for å finne noko som liknar. 

Sandane er med sigeren oppe på 4. plass på tabellen. I vekene framover møter STIL lag som ligg om lag på same stad på tabellen, og vi kan glede oss til tette og gode oppgjer.