Formelt skipa 10. januar 1923

Sandane Fotballklubb var namnet og klubben gjorde det godt alt i første sesong.

Bilettekst: Sandane fotball-lag vart krinsmeister i klasse B i 1923, same året laget vart skipa. Framme f.v.: Martin Eckhoff, Jakob Haugen, Agnar Nyhagen, Nils Holme, Wilhelm Eckhoff og Einar Henden. Bak f.v.: Arne Tystad, Lasse Grønfur, Martin Sande, Olav L. Henden og Ola Holvik. Kampane til laget vart spelte på Utstillingsplassen på Øyrane.

Tekst: Jan Nik. Hansen

Fotballen kom til Nordfjord rundt 1900, men eldre folk på Sandane opplyste til meldingsbladet for Sogn og Fjordane Idrettskrets nr. 1/1950 at det vart spelt fotball på Utstillingsplassen på Øyrane før hundreårsskiftet.

Meir konkret veit vi at Sandane fotball-lag vart skipa 10. januar 1923 med Olav L. Henden som første formann. I 1927 og 1928 er Agnar Nyhagen formann, og laget melde seg inn i Sogn og Fjordane fotballkrets (skipa i 1922) og dermed også i Norges Fotballforbund.

Allereie i skipingsåret 1923 vart Sandane krinsmeister i klasse B, men soga til Sandane fotball-lag er kort. Aktiviteten og betalande medlemmer gjekk tilbake. I 1928 var det berre ein betalande medlem igjen. På årsmøtet i STIL i 1927 var spørsmålet om samanslåing med Sandane fotball-lag oppe for første gong, og i 1933 vart den formelle samanslåinga godkjent i dei to laga.