Maria Skaaden (1925-2016)

Maria Skaaden vart gravlagt frå Vereide kyrkje fredag 15. januar. Med Maria er ein av STILs mest profilerte idrettsutøvarar gått bort. Ho var ein pioner innan kvinneidretten i kommunen og fylket. Ho herja på handballbana og var ei føregangskvinne for kvinnefriidretten.

Vi kjenner Maria Skaaden som ein svært ihuga STIL-tilhengar. Ho følgde fotballaget i 4. divisjon nøye heilt til det siste. Når vi bladar tilbake i STIL-soga er det ikkje vanskeleg å skjøne bakgrunnen for hennar idrettsinteresse. Ho vaks opp i idrettsfamilien Solheim og vart sjølv aktiv innan spesielt friidrett og handball.

Ho spelte organisert handball frå 1945 til midt på 60-talet, og blir av Ove Eide («Hundre år med STIL») omtala som ein av dei store idrettspersonlegdomane i STIL. Sandane hadde eit godt handballag som i 1957 nådde heilt til 4. runde i Norgesmeisterskapen. Der tapte STIL 3-4 for Bergenslaget Viggo. Maria Skaaden sette inn alle Sandane sine mål.

Maria Skaaden braut barrierer i ei tid då det ikkje var sjølvsagt at kvinner deltok i friidrett. I STIL si historie har ho ein stor plass som pioner innan kvinnefriidrett. Prestasjonane hennar vart lagt merke til utanfor fylket og ho deltok også på samlingar utanfor fylket.

I 1948 vart Maria krinsmeister både i høgde og lengde utan tilløp, og ho sto med fire krinsrekordar – i lengde utan tilløp, høgde utan tilløp, kule og spyd!

Vi lyser fred over Maria Skaaden sitt minne.