Sandane klatrar på tabellen

STIL med sterk tomålsseier i slitekamp mot Kaupanger.

Kampfakta:

Sandane – Kaupanger

4. divisjon

Idrettsplassen

1-0 (23. min) Thomas Dyrrdal

2-0 (90 min +) Jonas Løvland

Sandane: Simon Andre Gimmestad, Vegard Krøvel Flatjord, Håkon Schjølberg (Sebastian Bujnicki frå 70. min), Martin Svarstad, Eirik Rauset, Andreas Bjørkum Vereide, Ole Andre Aa (Tarjei Bjørkum Vereide frå 71. min), Jonas Løvland, Ingebjørn Mundal, Sebastian Haugen, Thomas Dyrrdal. Reservar: Arne Nybø Gangeskar, Kyrre Vereide Kroken, Magnus Nikolai Bolseth, Kristian Møll, Sebastian Bujnicki, Tarjei Bjørkum Vereide, Gudmund Bjotveit.

Kaupanger: Lasse Asperanden, Kristoffer Dalaker, Henrik G. Førde, Vegard Øien (Eirik Menes frå 78. min), Andre Solbakken Skjerven (Petter Osen frå 68. min), Victor Aguiar, Kristian Hauståker, Åsmund Øgar (Brugrand frå 74. min), Andreas Sannebo, Kennet Dvergedal, Ole Einar Rebni. Reservar: Aksel Asheim, Eirik Hellebust Menes, Petter Wefring Osen, Kjetil Andre Moen Eide, Christopher Skjær Brugrand.

Dommar: Per Oddvar Lien, IL Høyang

Gult kort: Ole Einar Rebni, KIL

Sandane tok alle poenga mot eit fysisk hardt arbeidande Kaupanger fredag kveld. Heimelaget hadde dei fleste og største sjansane, men det etterlengta andremålet som kunne avgjort kampen let vente på seg. Først på overtid ordna Jonas Løvland 2-0 for STIL.

Sandane opna kampen best, sjølv om dei kanskje aldri kom heilt opp på nivået som vi såg i førre seriekamp. Kaupanger er eit vanskeleg lag å spele mot, og utallige er dei frisparka og høge ballane som vart pumpa framover mot Sandane sitt forsvar denne fredagskvelden. Sandane sitt forsvar med Gimmestad og firaren Flatjord-Svarstad-Schjølberg-Rauset er patent og fekk vist det i kveldens kamp. Kaupanger sleit lenge med presisjonen framover og skapte lite. Nærast mål var dei grønkledde då Ole Einar Rebni sitt frispark frå 16 meter gjekk i tverrliggaren rett før pause. Ein av kampens finaste prestasjonar.

Jonas Løvland kom til kampens første store sjanse då han møtte eit innlegg flott framfor mål tidleg i første omgang. Men målvakt Lasse Asperanden redda glimrande.

Etter 23 minutt var det klart for 1-0 då Thomas Dyrrdal mottok eit framspel, drog seg fri og skåra slik vi har sett han gjere ein del gonger før. På dette tidspunkt i kampen fortent nok.

Spelet jamna seg noko ut, men utan at KIL klarte å skape så  mykje offensivt.

I andre omgang venta vi stadig på den forløysande skåringa, men det vart ein stillingskrig der frustrasjonen over dommaravgjerder såg ut til å skru intensiteten og duellkrafta opp fleire knepp. Frustrerte spelarar får vere glade for at det ikkje vart alvorlege skader på nokon.

2-0 kom på overtid, med Jonas Løvland i hovudrolla, først nedover sidelina og sidan skrått inn mot mål. Avslutninga frå ganske så skrå vinkel dundra ballen i nota i lengste hjørne.  

Kampen fekk ei kanonavslutning då Andreas Vereide fyrte av frå det vi antar må ha vore 40 meter pluss. Ballen gjekk i stolpen og såg i grunnen ut til å vere inne, der ved stanga. Men dommar Lien hadde sine tvil og let spelet gå.

Med denne seieren er Sandane oppe på 22 poeng, tre poeng bak andreplass på tabellen. Det vil vi tru inspirerer!

-Vi gjer det spennande for oss sjølve, er uheldig i avslutningane og klarer ikkje punktere kampen, uttala STIL-trenar Øyvind Hervik etter kampen. –Vi veit at KIL vil kjempe heilt inn, og det fekk vi jo dokumentert i dag.

STIL-trenaren konstaterer at Sandane no har ei sentralline med rutinerte spelarar, frå Simon Gimmestad i mål til Thomas Dyrrdal på topp. –Dei rutinerte spelarane er med på å løfte dei andre spelarane på laget, konstaterer Hervik. Han seier at slik kampen utvikla seg ønskte han ikkje å sleppe innpå dei yngste spelarane frå benken.

LIVE-oppdatering annan stad på sida.