Uavgjort i Naustdal

Sandane opna godt og fekk ei tidleg leiing i borteoppgjeret mot Tambarskjelvar fredag kveld. Vertane utlikna, men STIL fekk ny leiing midtvegs i andre omgang. Forsøket på å styre inn til tre poeng lukkast imidlertid ikkje. Eit heiltent heimelag fekk si utlikning nokre få minutt før slutt.

Kampfakta:

Tambarskjelvar - Sandane 2-2 (1-1)

4. divisjon

Naustdal Stadion

0-1 (13. min) Magnus Nikolai Bolseth

1-1 (35. min) Frode Fjørstad

1-2 (63. min) Jonas Denk (straffe)

2-2 (88. min) Marius Ion Giorghita

Dommar: Thor Kristian Sortevik, Svelgen TIF

Gule kort: Espen Langedal, Anders Øen og Andreas Vatne, alle Tambarskjelvar.

Tambarskjelvar: Markus Hjelle Cirotzki, Dan Joar Vårdal Høiås, Jesper Tomassen, Espen Langedal, Martin Hukset, Andreas Vatne, Anders Vilnes Øen, Tor Emil Gjøringbø, Frode Fjørstad, Marius Ion Ghiorghita, Gunnstein Vefring, Daniel Heggelund, Joakim Engebø, Vladimir Deletic, Sondre Herstad, Andrè Sølvberg, Villy Andrè Engebø.

Sandane: Simon Gimmestad, Vegard Krøvel Flatjord, Håkon Schjølberg, Martin Svarstad, Anders Silden (William Landøy frå 82. min), Eirik Rauseth, Ingebjørn Mundal (Kristian Møll frå 90. min), Jonas Denk, Sebastian Bujnicki, Magnus N. Bolseth (Jon Vegard Byrkjedal frå 42. min), Thomas Dyrrdal.

Sandane opna best og hadde ballen i mål etter kort tids spel. Thomas Dyrrdal gjekk frå midten, men vart vinka av for offside. Like etter kunne Vegard Krøvel Flatjord fort ha nikka ballen i mål då han var perfekt plassert etter corner, men ballen sklei av og til sides for stolpen.

Tambarskjelvar kom roleg inn i kampen, og etter kvart var det heimelaget som hadde best trøkk framover. Dei kom fleire gonger til innlegg som nesten nådde fram i boksen, men det lukkast ikkje heilt. Heimelaget hadde i denne fasen av kampen svært få avslutningar direkte på mål, og Sandane-forsvaret hadde rimeleg kontroll.

Sandane hadde fleire gode angrep der ballen gjekk fint frå mann til mann, og skapte innleiingsvis i kampen dei største sjansane.

To forhold gjer det slitsomt å vere STIL-patriot under ein slik kamp: Pasningsspelet er periodevis svært upresist. I til dels upressa situasjonar havna ballen hos motstandar. -Vi gjer det litt for vanskeleg. Det enklaste er oftast det aller beste, uttaler trenarane Øyvind Hervik og Espen Aagård.

Det andre vi må trekke fram er duellspelet. Det er litt for mange i blått som ikkje trykker nok til i duellane, og det varierer også mykje når det kjem til rørsle og interesse for å kjempe om andreballen.

Sandane gjekk inn i "Florø-modus, andre omgang" utover i første omgang. Det var derfor heilt på sin plass når Frode Fjørstad utlikna til 1-1 på eit fint langskot. Ved det høvet hadde STIL mange mann mellom Fjørstad og målet, men dessverre var ingen ute og pressa Fjørstad.

I andre omgang opna Tambarskjelvar best, men Sandane kom atskillig betre med etter kvart. I ein situasjon vi ikkje har oversikt over vart Sandane tildelt straffe etter ein situasjon i feltet. Anders Silden og Anders Øen i duell, sistnemnde fekk gult kort. Straffa sette Jonas Denk knallsikkert i mål. Etter dette såg Sandane muligheten for 3 poeng, og ofra ikkje alt framover på bana. Tambarskjelvar var imidlertid framleis nummer 1 når det gjaldt duellane, men lagets utfordring låg i å kome til dei gode avslutningane.

Eit litt billeg frispark 25 meter frå mål skulle imidlertid gjere susen. Det vart flott lagt inn i feltet av det vi oppfatta var Frode Fjørstad, men som den meir lokalkjende Firda-live-mannen omtalar som Vladimir Deletic: der inne venta Marius Ion Giorghita. Ein fin stuss med hovudet og stillinga var 2-2. Etter dette heiv begge lag seg framover for å få den avgjerande skåringa. Tambar var nære på på fleire oppløp, men sleit med presisjonen i det siste trekket. Sandane var også på visittar i Tambars felt, blant anna med eit frispark frå mykje godt same posisjon som ved Tambars utlikningsmål. Dessverre for STIL ikkje godt nok utnytta.

Dermed 2-2 i ein kamp som heimepublikummet karakteriserte som årsbeste for  Tambar, medan Sandane enno slit med å gjennomføre kampane med eit spel slik dei ønsker. Laget mistrivdest klart med Tambars fysiske og stadig hardare duellspel.

Begge lag gjekk litt skuffa av bana. Når det er sagt: periodevis var dette ein svært underhaldande kamp der det skjedde mykje på begge banehalvdelar.

Eit anna interessant moment i kampen: Tambarskjelvar nytta regelen om fritt ut- og innbytte av spelarar aktivt. Ein liten pause på benken for så å hive seg inn i aktiv strid igjen, såg ut til å gjere fleire godt. Sandane brukte ei meir tradisjonell tilnærming.

Les vårt LIVE-referat frå kampen.

Les Tambarskjelvars skildring av hendingane