Sandane med knipe tap for serieleiaren

Sandane 2 spela tysdag kveld heime mot serieleiaren i 6. divisjon, Haugen. STIL sitt andrelag var i fortent leiing ved pause, men i andre omgang kom superveteranane i Haugen med svar på tiltale.

Sandane 2 - Haugen 3-4 (2-1)

6. divisjon avd 3

Sandane Idrettspark

1-0 (14. min) Arne Morten Vilnes Øen

1-1 (36. min) Kennet Remme

2-1 (40. min) Arne Morten Vilnes Øen

3-1 (46. min) Sverre J. Løken

3-2 (78. min) Jim Rune Skrede

3-3 (80. min) Tor Henry Challen

3-4 (90 min) Michael Åsebø Berg

Dommar: Markus Nybø Bakke, Eid IL

Gule kort: Arne Nybø Gangeskar, Petja Cink, Knut Olav Arnestad, Sebastian Bujnicki, Sandane. Tor Henry Challen, Haugen

Raudt kort: Jonas S Larsen (80. min). Sebastian Bujnicki (2 gule kort)

Sandane 2: Arne Nybø Gangeskar, Espen Reed Lote, Magnus N. Bilseth, Arne Morten Vilnes Øen, Knut Olav Arnestad, Egil Brekke, Ruben E. Nesdal, Sebastian Bujnicki,, Martin Kolseth Skaar, Petja Cink, Sverre Løken. Innbyttarar: Jonas Sevilhaug Larsen, Håvard Bergheim Holvik, Daniel Tsehaie, Tor Kristian Eikenes. 

Etter ein god Haugensjanse tidleg i kampen, var det Sandane 2 som hadde fullstendig kontroll over hendingane på grasmatta. Heimelaget fekk fortent 1-0 ved Arne Morten Vilnes Øen. Flott angrep av STiL og ein flott assist av Ruben Elvebakk Nesdal. Sebastian Bujnicki hadde eit pent langskot frå hjørnet av 16 meter, i krysstanga og ut. Seinare vippa Sverre J, Løken ballen fint med seg i feltet, ballen havna etter kvart hos Ruben Nesdal, som avslutta med skot til sides for mål. Etter ein halvtime slapp Haugen betre til og kom lenger framover på bana. Det vart 1-1 på Haugen si andre avslutning på mål i kampen. Men Sandane 2 kom tilbake og auka til 2-1 ved Arne Morten Vilnes Øen fem minutt før første omgang var spela.  

I andre omgang var kampen jamspela, og til skilnad frå første omgang var Haugen langt meir frampå offensivt. Laget er forsynt med ei god blanding av unge og eldre spelarar, og den eldste på bana mistenker vi er ca 3 ganger så gamal som dei yngste aktørane. 

Med 12 minutt igjen av kampen gjorde superveteran Jim Rune Skrede det sjølv: gjekk solo og avslutta med eit godt skot i mål. 3-2 og Haugen fekk sjansen igjen kort tid etter. Jonas S. Larsen felte ein Haugenangripar som sisteforsvarar, og fekk raudt kort. Frisparket frå 18 meter sette Tor Henry Challen kontant i mål. Med ein mann mindre på bana vart det for tungt for Sandane 2, trass i at dei på ingen måte gav opp. Nærast var Håvard B. Holvik då han mottok ballen frå Daniel Tsehaie i feltet, men utan å få skikkeleg treff. 

Sebastian Bujnicki snakka på seg sitt andre gule kort på veg ut av bana etter kampslutt, og Sandane 2 fekk såleis to spelarar med raudt kort i kampen.

Sandane 2 hadde fleire A-lagsspelarar i aksjon frå start i kampen. Mot slutten vart dei teke av bana, og det er nok noko av forklaringa på at kampen vippa så tydeleg i Haugen sin favør mot slutten.