Uavgjort igjen!

-Sit og riv meg litt i håret enno, melder STIL-trenar Jan Asle Rustøen etter at Sandane spelte uavgjort mot Studentspretten mandag kveld.

Sandane – Studentspretten 2-2 (1-2)

3. divisjon damer, avd 1

0-1 Tuva Søreide Solberg (13. min)

0-2 Tuva Søreide Solberg (22. min)

1-2 Karoline Hjelle (34. min, straffe)

2-2 Karoline Hjelle (72. min)

Gult kort: Sofie Borge Tilrem, Sandane

Dommar: Johnny Skjerven, Kaupanger IL

Sandane: Kristina Hjelle, Helene Klakegg, Thea Flatjord Sunde, Alva Johanna Heggdal-Verlo, Katrine Bruland, Malene Utheim, Andrea Årsheim Bakkebø, Sofie Borge Tilrem, Karoline Hjelle, Kristine Lothe Rustøen, Sara Lothe Rustøen. Innbyttarar: Marie Ravnestad Mykland, Regine Aa Sandale, Borkny Kristin Hetle.

Bilder: Svein Kristiansen

Studentlaget verka godt førebudde, hadde god kommunikasjon i laget og opna klart best i Idrettsparken. Sandane var imidlertid også med, og glimtvis såg vi godt samspel og kloke involveringar frå dei blåkledde. Den første halve omgangen var det imidlertid gjestene som kom til flest avslutningar, og Tuva Søreide Solberg var dyktig då ho klarte å lirke ballen mot ope mål i duell med Sandane sitt forsvar. Same Solberg var frampå igjen om lag halvvegs i omgangen, og med 0-2 såg det tungt ut for STIL.

-Vi var dårlege i første del av kampen, men fekk gjort nokre justeringar. Etter det snudde kampbildet seg og vi kom betre med, seier Sandanetrenar Jan Asle Rustøen. Sandane reduserte til 1-2 på straffe ved Karoline Hjelle, og det var igjen kamp om poenga. Den same Karoline utlikna til 2-2 i andre omgang, etter ein innøvd corner.

-Nett no er det litt surt at vi ikkje vann. Vi hadde ein kjempesjanse til å avgjere det heile rett før slutt, slik som i kampen mot Stryn i forrige serierunde (2-2), seier Jan Asle Rustøen. Men Studentspretten sin keeper redda avslutninga og dermed vart det poengdeling denne kvelden.

Studentspretten viste seg å vere eit voksent lag med solide, gode spelarar. Sjølv om STIL-trenaren var noko misnøgd med opninga av kampen, let underteikna seg underhalde av to gode lag som gav kvarandre glimrande kamp.