Årets Fair Play-lag i STIL: J13 og G13

STIL sine 2009-kull (gutar og jenter) er saman med trenarar og lagsapparat tildelt prisen som årets Fair Play-lag i STIL!

Juryen hadde fleire svært gode kandidatar å velje mellom, men landa til slutt på at J13 og G13, som dette året har jobba målretta for å endre ein negativ haldningskultur i kullet, var svært fortente vinnarar av prisen.

Utgangspunktet våren 2022 var krevande for J13. Jentefotballen hadde låg status. Ein opplevde at jentespelarar sine ferdigheiter kunne bli snakka ned.

Lagsapparatet tok tak i dette. Sidan våren 2022 har 2009-gutane og 2009-jentene trena saman, minst ein gong i veka. Gjennom målretta inkludering og tydeleg vaksenleiing, med G13-trenar Magne Larsen i spissen, såg ein raskt ei endring hos både jentene og gutane. Jentene vert no sett på som likeverdige treningspartnarar. Gjennom dette arbeidet ser ein at jentene sin status som fotballspelarar har blitt langt større, i tillegg til at jentespelarane sjølv har auka både mestringskjensla og sjølvtilliten på og utanfor bana. Gutane viser seg som rause, inkluderande og trygge spelarar på bana.

J13 og G13 har gjennom denne målretta prosessen kome langt når det kjem til inkludering, respekt og toleranse, og er svært fortente vinnarar av årets Fair Play-pris. Prisen går også til lagsapparatet, som har vore ansvarlege for grepa som vart tatt på vårparten i 2022. Juryen har også vektlagt at lagleiar på J13 tok ansvar og fekk flytta eigen kamp då det viste seg at damelaget hadde klart å dobbeltbooke Idrettsparken.

Vi gratulerer J13, G13, trenarar og lagsapparat med prisen, som er ein pizzakveld på Mona Lisa!

Lagsapparat J13: Trenarar: Yngvil Søholt og Renate Ryssdal. Lagleiarar: Eva Isene og Hege Marita Svalheim.

Lagsapparat G13: Trenarar: Magne Larsen, Ingvild Imerslund, Lene Seime. Lagleiar: Sunniva Grov Døskeland.

Juryen har bestått av to medlemmer frå Fair Play-utvalet, Margot Meling Nesgård og Svein Kristiansen, samt trenarrettleiar Torbjørn Gran.

Av nominasjonane juryen har motteke ser vi at Fair Play er ein viktig del av haldningskulturen i STIL fotball. Det vert arbeidd godt med å fremje haldningar der spelarane viser kvarandre respekt uansett ferdigheitsnivå, og der ein syner ein bevisstheit om Fair Play i møte med andre lag. «Fotball skal vere gøy» er eit berande prinsipp, og tidleg vektlegging av respekt, glede og positivt engasjement har gitt synlege resultat over tid. Nokre lagsapparat dyrkar bevisst fram ein gruppekultur gjennom faste rutinar når treningane startar og vert avslutta.