Vår største fotballkjendis - heilt utan primadonnanykker

Steinar Holvik fekk ei ualminneleg rik dommarkarriere og var kjendis i fotballverda. Her heime har han vore den mest jordnære og trufaste tillitsvalde vi kan tenke oss - som dommaransvarleg i STIL gjennom mange år.

• 1995: Steinar Holvik, Sandane debuterer som assistentdommar i 1. divisjon og er året etter i aksjon under eliteseriekampen mellom Molde og Rosenborg.
• 2000: Steinar Holvik er assistentdommar under cupfinalen på Ullevaal (Odd Grenland –Viking).
• 2006: Barcelona møter Arsenal i Champion League-finale i Paris. Dommartrioen er norsk, og den eine assistendommaren er Steinar Holvik, med adresse Sandane.

Til saman fekk Steinar Holvik 100 internasjonale oppdrag i perioden 1998-2011, noko som plasserer han på tredje plass blant norske assistentdommarar i antall slike oppdrag. Og ja, vi snakkar om samme mann som ein heilt vanleg septemberkveld dømmer Sandane og Svelgen i 2. divisjon avdeling 3 i G13-klassa. Og jau, det er samme mann du kanskje har sett på treningsfeltet og på sidelina når J14-15 er i aksjon. Og heilt rett – det er samme mann som har vore dommaransvarleg i STIL dei siste 18 åra.

Kjendis i fotball-Norge

-Målet var å kome til VM i Tyskland , men slik blei det ikkje. Det var veldig skuffande. Vi følte oss ganske sikre på at vi ville bli vurdert som gode nok, fortel Steinar. -I kvalifiseringa hadde vi dømt ein kvalikkamp mellom Sveits og Frankrike, med FIFA-sjef Blatter og fleire på tribuna. I ettertid tenkte vi at den kampen kanskje var avgjerande for at vi ikkje blei uttekne, seier Steinar.

FIFA assistentdommar

Steinar begynte som divisjonsdommar lokalt, men tok raskt steget opp i det som var dåverande 2. divisjon. I 1997 såg Reidar Bjørnestad, dåverande dommarsjef i Norge, Steinar dømme ein fotballkamp. Han meinte Steinar burde reindyrke rolla som assistendommar. Som sagt så gjort. I 2000 vart Steinar oppnemnt som FIFA assistentdommar og sidan følgte travle år.

I 2001 vart han tatt ut til EM for U16-lag i England. Same haust vart han som einaste norske dommar teken ut til VM for U17-lag i Trinidad/Tobago.

Om nokon skulle tru noko anna: å klage på dommaren er ikkje noko nytt fenomen. Etter VM i 2002 hadde det vore mykje negativt fokus på dommarane, og året etter deltok Steinar på ein internasjonal FIFA-samling i Sveits. UEFA bestemte der at ein frå 2004 ønskte å ha dommartrioar der alle var frå same land. Dommarsjef Bjørnestad meinte at ein i Norge skulle satse på Terje Hauge og tre assistendommarar i same team: Steinar Holvik, Ole Hermann Borgan og Arild Sundet.

EM, U20-VM - og Champion League-finale

Slik blei det. Dei norske dommarane deltok i EM i Portugal i 2004, VM for U20-lag i Holland i 2005. -Der dømde vi forresten finalen mellom Argentina og Nigeria, med ein ung Lionel Messi i aksjon for Argentina, fortel Steinar.

Steinar var internasjonal dommar til 2013, men dei siste åra sleit han med korsbandsskader og det vart færre kampar. Men kontakten med dei gamle dommarkollegaene vert framleis halden ved like. -Vi møtes årleg til sosialt samver med ektefellene våre, fortel han (bildet under: dommarkollegaene Ole Hermann Borgan, Terje Hauge og Steinar Holvik møtest årleg. Her inspiserer dei VAR-senteret i Oslo. November 2022).