Lettkjøpte mål senka Sandane 2

Periodevis godt spel, men Stadlandet tok alle poenga.

Sandane 2 – Stadlandet (1-3)

6. divisjon avd 2

0-1 (16. min) Kai Arne Otneim

0-2 (19. min) Asbjørn Losnegård

0-3 (37. min) Asbjørn Losnegård

1-3 (45 min+) Sverre Løken

2-3 (51. min) Kristian Møll

2-4 (90 min +) Asbjørn Losnegård

Dommar: Roger Skavøypoll, Skavøypoll IL

Gult kort Sandane 2: Torbjørn Gran. Rødt kort: Jonas S. Larsen (90 min+)

Sandane 2: Arne Nybø Gangeskar, Jonas S. Larsen, Johan Lothe, Torbjørn Gran, Ruben Elvebakk Nesdal, Bjarte Leite Kalvøy, Andreas Dyrrdal, William Landøy, Kristian Møll, Øystein Tennebø Fure, Sebastian Haugen, Daniel Tsehaie, Gudmund Bjotveit, Tarjei Bjørkum Vereide, Sverre Løken.

Stadlandet: Sverre Leikanger, Ahmad Heidari, Kristoffer Vårdal, Øyind Bakkebø, Simon Gulbrandsen, Sigve Ronny Røkås, Tore Høybakk, Marius Sjåstad Kongsvoll, Kai Arne Otnheim, Magnus Leikanger, Johan Oliveira H. Johansson,  Asbjørn Losnegard, Håvard Otneim, Håvard Hovden Borgund, Ole Refsnes, Hans Ole Drage, Jarle Leikanger.

Sandane opna kampen med å ta eit godt grep om Stadlandet reint spelemessig. Gjestene hadde nkre få oppløp som STILs forsvar tok seg greitt av. Ein liten nedtur då når Kai Arne Otneim fekk ballen i mål etter ein corner. Få minutt etter vart det 0-2 på eit frispark frå kanten av 16meteren. Det såg ut som forsvarsmuren til Sandane 2 var feilplassert der. Som om dette ikkje var nok, kom 0-3 på det som må kallast ei gåvepakke.

Sandane 2 trengte no ei skåring før pause, og mannen å lite på i slike samanhangar er Sverre Løken. Eit glimrande STIL-angrep der ballen suste frå mann til mann gav Løken høvet til å vise iskald sinnsro i avslutningsarbeidet.

Sandane 2 kom på bana i andre omgang som eit nytt lag. Borte var alt snikksnakk og vi såg hurtige ballvekslingar og flotte angrep. Eit superangrep langs venstre kant enda med eit hardt innlegg i feltet som Kristian Møll banka i mål.

Sandane 2 pressa på og ville gjerne ha eit mål til. Laget spelar tidvis glimrande, med raske ballvekslingar og ditto færre ballføringar. I dag såg det ut som mykje skulle pressast gjennom i midten, og det var dumt. Der venta Stadlandets beste spelarar. Størst sjansar skapte Sandane 2 når dei brukte flankane.

Etter mange angrepsforsøk går det slik det gjerne går: Stadlandet fekk også sine sjansar. Frå straffemerket sørga tremålsskårar Asbjørn Losnegård for at sluttresultatet vart 2-4. Det kunne fort blitt eit mål ekstra for Sandane 2 då Sverre Løken kom kjapt fram på sida og la inn til Tarjei Bjørkum Vereide. Han nikka over mål frå kort hald.

Mykje positivt i dette Sandane 2-laget, som har i seg mykje god fotball. Det er eit ungt lag og vi ser at gutespelarane i troppa viser betre og betre igjen i kampbildet. Luk vekk dei billege baklengsmåla, så blir det poeng utover hausten. Andre omgang var eit stort løft!

Vi gratulerer Stadlandet med seieren, fleire der som viste at dei har både teknikk og fotballforståing.