Sterk sesongopning av Sandane
Forfatter: Svein Kristiansen
18. april 2015
Sandane snudde 0-2 til 3-2 på 20 minutt.
Kampfakta:
Høyang - Sandane 2-3 (0-1)
1-0 (36. min) Mats Loftesnes
2-0 (48. min) Jakob Bergset
2-1 (72. min) Jonas Denk
2-2 (74. min) Jonas Løvland
2-3 (90. min +3) Jonas Løvland
Sletta, kunstgras
Dommar: Runar Hageland, TMFK. Assistentdommar: Sjur Reisæter Haugen, Dale og Arnfinn Hallanger, Førde.
Gule kort: Mats Loftesnes, Jakob Bergset, Høyang. Martin Svarstad, Sandane
Høyang: Markus T. Vefring, Christopher Maureira, Edin Agovic, Michael Våge (Vegard Breidvik frå 87. min), Sander Stølen Olsen, Mats Loftesnes, Eirik Blikken Haukøy, Andreas Haaland Bergen, Jakob Bergset, Thomas Frichsen (Luis Maureira frå 33. min).
Sandane: Simon Gimmestad, Eirik Rauset, Martin Svarstad, Jonas Løvland, Anders Silden, Ole Andre Aa (Sebastian Haugen frå 17. min), Jonas Denk, Ingebjørn Mundal, Jon Vegard Byrkjedal, Magnus N. Bolseth (William Landøy frå 73. min), Thomas Dyrrdal.
Jakob Bergset nikka ein corner i stanga og ut etter få minutts spel, og Høyang hadde fleire gode mogelegheiter. Simon Gimmestad måtte fleire gonger rydde opp i duellar mot Høyangspissane.
Då Mats Loftesnes gav Høyang 1-0 var det fullt fortent etter spel og sjansar.
Sandane skapte imidlertid også sine sjansar. Like etter målet var Thomas Dyrrdal svært nær å utlikne, då han nikka eit innlegg frå Jon Vegard Byrkjedal lekkert vidare mot kassa. Ei praktredning av målvakt Vefring hindra utlikning.
Sandane gjekk til andre omgang med visse om at dei no ville få dalavinden i ryggen. Det var ein nedtur då Jakob Bergset nikka ein corner i mål etter få minutts spel.
Høyang var giftige og hurtige i sitt angrepsspel, og Joakim S. Måren kom fleire gonger til avslutningssjansar frå sin venstre kantposisjon. Men STILs forsvar og ikkje minst Simon Gimmestad redda det som kom.
Midtvegs i andre omgang gjorde trenarbenken til Sandane fleire grep. Sandane spelte no med 3 mann i forsvar, fem på midten og to angriparar. Ingebjørn Mundal på midten bytte plass med Jonas Løvland i midtforsvaret. Ingebjørn løyste oppgåva perfekt, og Løvland i sin nye posisjon skulle også bli avgjerande for kamputfallet.
Med Jonas Denk si redusering til 1-2 endra kampen brått og fullstendig karakter.
Sandane overtok spelet og la press mot Høyang, som verka usikre og fekk nok med å forsvare seg. Då STIL utlikna til 2-2 eit par minutt etter første redusering, skjedde det etter eit av dei finaste angrepa i kampen. Ballen gjekk lynraskt framover og assisten frå Sebastian Haugen til Jonas Løvland på perfekt løp inn i boksen kunne ikkje vore betre.
Eit stort publikum, som inntil no hadde skapt liv og røre langs bana, vart brått overdøvd av elvesusen.
Kampen var på dette tidspunkt heilt open, og det låg fleire mål i lufta. Høyang heldt fram sitt gode kontringsspel, spelte seg til cornerar og hadde også ein gigasjanse til å avgjere det heile nokre få minutt før slutt. Sandane ville uansett vore svært nøgde med eit uavgjort resultat i denne kampen, men tre minutt på overtid fekk publikum vere vitne til kampens mest spektakulære øyeblikk: STILs beste spelar, Jonas Denk, vart takla hardt og dommar Hageland dømde korrekt nok frispark. Avstanden til mål er i ettertid vurdert å ha vore 33 meter. Jonas Løvland valde det umogelege, og eit vantru publikum var vitne til at kula fauk inn ved høgre krysstang. Ein fantastisk idrettsprestasjon, og enorm jubel i STIL-leiren.
Etter denne magiske og uverkelege hendinga forsvarte Sandane seg inn til tre overraskande poeng.
-Eit ran, konstaterte Høyang-trenar Svein Inge Bergset, etter kampen.
-Ein spennande og levande kamp. Sandane har eit godt lag som på sitt beste matchar dei fleste, var Ole Andre Aa sin kommentar etter kampen. Ein glad STIL-trenar, Øyvind Hervik, berømmar laget sitt og gav kred til sine medtrenarar for gode taktiske vurderingar undervegs.
Høyang blir eit lag som mange vil streve med å hente poeng frå i årets sesong. Det er eit spelande lag, med duellvilje og - i alle fall i denne kampen - høg tenning. Det vart ein del etterslengar som dommar Hageland kanskje kunne slått hardare ned på.