G17 til topps i Sparebanken Vest Cup

Ein fantastisk dag for STIL-fotballen

Sandane 1 og 2:

Det blei ein fantastisk dag for STIL-fotballen i Nordfjordhallen. Vi stilte med to lag i G16/17 klassa, og begge laga gjorde det knallsterkt i gruppespelet. Sandane1 blei nummer ein i si gruppe etter tre strake sigrar. Sandane2 blei nummer to i den andre gruppa etter å ha vunne tre av fire kampar.

Plasseringane som nummer ein og to gjorde ‘dessverre’ at våre to lag måtte ut i semifinale mot kvarandre. Det blei ei svært tett duell der Sandane2 leia heilt til det stod att to minutt av kampen. Då greidde Sandane1 å legge inn ein sluttspurt og det stod til slutt 4-3 i favør Sandane1.

I finalen møtte Sandane1 Måløy1 som mønstra sitt beste mannskap. Her var Sandane1 verkeleg påskrudde og måløyværingane fekk verkeleg køyrt seg. Det var solid jobbing både bakover og framover på bana, vi var tøffe i taklingane og kontante framfor mål. Kampen stod og vippa litt midtveis, men vi styrte til slutt kampen inn til sluttresultatet 3-1.

Med det kunne Sandane1 løfte pokalen og nyte ein fortent seier og reise heim som vinnar.

Sidan det ikkje blei avvikla bronsefinale enda Sandane2 på delt tredjeplass.

Alt i alt ein strålande dag, og for oss som trenarar er det spesielt gledeleg å sjå at begge våre lag hevda seg heilt i toppen i turneringa. Det vitnar om ein brei og sterk tropp som har potensiale til å hevde seg godt i seriespelet komande sesong.

Helsing trenarteamet

Lars Endre Gimmestad, Egil Brekke og Asbjørn Midthjell

Hovudbildet er teken av Stig Høynes, bilde nr. 2 av Egil Brekke